پرۆژەی لێکووڵینەوەی ئەدەبی «دەلاقە»
پرۆژەی لێکووڵینەوەی ئەدەبی «دەلاقە» ک لە ڕەهەنگەیل دیرووکی و ڕخنەگرانە نووڕێدە ژانڕەیل جیاجیای ئەدەبی کوردی لە ڕووژهەڵات کوردستان،
زنجیرە کتاوەیلێگە لە مامووستا شەریففەلاح نۊسەر و توێژەر، لە شەش بەرگ و لە سێ هەزار و 684 لاپەڕە ک لەلایەن چاپەمەنیمادە-وە چاپ و بڵاو بۊنە. نۊسەر، ئی پرۆژە وە شێوەی زانستی و ئاکادمیک، قاتبەنی و جیاکردنەوەی ژانڕەیل جیاواز ئەدەبی کوردی، کووەو کردێیە.
ناوەڕۊک باوەتەیل ئی کتاوە، وە شێواز وتوێژ و وتار و لێکووڵێنەوەی ئەدەبی و زوانییە. بەرگ شەشم، لە سێ بەش نۊسریایە. بەش یەکم؛ جمشت باشوور ک چەن دیدار و دیمانە وەل نۊسەرەیل و شاعرەیلە. بەش دوێیم؛ وەرز وتارە ک لەسەر ئیلام و کرماشان و یارسانەیلە. بەش سێیەم؛ نووڕین وە زوان و ناسنامەی کوردی لە کرماشان و ناسانن ڕێبازەیل دیرووکی شعرییە.
نۊسەر، لە پێشەکی کتاو، وە زاڵبۊن زوان فارسی لەسەر بڕێگ لە نۊسەرەیل ئیلام و کرماشان ئاماژە کەیگ ک چۊ نوخبەیل و ئلیتەیل ئی دو شوونە لە بوارەیل شێعر، چیرووک، ڕومان، سینەما و گوورانی، بۊنەسە پێشەنگ و خزمەتکەر وە دیگەری. خاڵ زت بەرگ شەشم یەسە ک شاعرەیل، توێژەرەیل و چیرووکنۊسەیل، لە نووڕگەیل دیرووکی، فەرهەنگی و کوومەڵایەتی، لەسەر زاراوەیل و بنزارەیل ناوچەیل ئیلام، كرماشان، قوروە و گەڕۊس گەپ دانە.
بەرگ شەشم؛ دەروەچەی واران، لە 496 لاپەڕە و لە 1000 جڵد چاپ و بڵاو کریایە. ئی بەرگە باس لە پرس فەرهەنگ و جییەی زوان و ئەدەب کوردی لە باشوور ڕووژهەڵاتە. ئی بەرهەمە یەکێگ لە وەنرخترین نۊسمانەیلێگە ک لەی بوارە نۊسریایە و ئەڕای توێژەرەیل و لادارەیل ئەدەبیات کوردی لە باشوور ڕووژهەڵات وە کەڵک ئەتێ.
