بێهرووز بووچانی؛ لەئیلام تا ولینگتۆن
بێهرووز بووچانی، نۊسەر، ڕووژنامەوان، توێژەر، چاڵاک فەرهەنگی و فیلمساز کورد، لە ساڵ ٢٨٦٣ کوردی، لە شار «بەدرە»ی ئیلام وەدیهاتێیە. کاک بێهرووز کارشناسی ئەرشەد زانستەیل سیاسی و جوغرافیای سیاسی دێرێ.
کاک بێهرووز ئێرنگە دانشیار زانستەیل کوومەڵایەتییە لە زانکوو نیوساوت وێڵز (UNSW). هەلەیوا جوور توێژەر خوڵککریای وەرد «ناوەند مهاجرەت ئاسیا–پەسیفیک سیدنی» زانکووی سیدنی هاوکاری کەیگ. ئەندام ئفتخاری «پێن ئینتێرنەشناڵ»ە و خاون خەڵاتەیلێگە چۊ «خەڵات میدیایی عەفو ناونەتەوەیی ئوسترالیا ٢٠١٧»، «خەڵات عداڵەت کوومەڵایەتی سەمپوزیوم دیاسپۆرا»، «خەڵات سەنەڵی چووڵ لیبێرتی ویکتۆریا ٢٠١٨» و «خەڵات ڕووژنامەوانی ئانا پۆلیتکۆفسکایا».
مەقاڵەیلێ بەردەوام لە گاردیەن بڵاو بوون و نۊسراوەیلێ لە گۆڤارەیلێ جوور سەتێردەی پەیپێر، هافینگتۆن پۆست، نیوو ماتیڵدا، فاینەنشاڵ تایمز و سیدنی مۆڕنینگ هراڵد بڵاو کریەی. کاک بێهرووز هەلەیوا وەگەرد ئارەش کەماڵی سەروستانی، کارگەردان هاوبەش فیلم چوکا، تکایە کات وە ئیمە بۊش (٢٠١٧)ە و لە نۊسانن شانۆنامەی مانوس بەرهەم نازەنین سەهامیزادەیش هاوکاری کردێیە.
کتاو ناسیاگەگەی کاک بێهرووز، یانێ بێجگە کۊەسان ڕەفیقێگ نەیرم: نۊسراوەیلێ لە زندان مانوس، «خەڵات ویکتۆریایی ئەدەبیات ٢٠١٩» لە بەش گشتی و بەش غەیرداستانی بردەو. هە لەیوا خاون «خەڵات تایبەت خەڵاتەیل ئەدەبی سەرۆکوەزیر ئیاڵەت نیوساوت وڵز»، «خەڵات سەنعەت کتاو ئوسترالیا ئەڕا کتاو غەیرداستانی ساڵ» و «خەڵات نەتەویی ژیاننامە»سە. کتاو ناسیاگەگەی تا ئێرنگە وە ١٨ زوان لە ٢٣ وڵات بڵاو بۊە و ئڕا پێشکەشکردن لە بان شانۆ و فیلم سینەماییش پسا ئامادە کریەی.
کاک بێهرووز جوور دانشیار خوڵککریای لە کالێج هونەر و زانستەیل کوومەڵایەتی زانکووی نیوساوت وڵز و کالێج یاسای بێربێک لە زانکووی لەندەن کار کەیگ. ئێرنگەیش لە شار ولینگتۆن لە وڵات نیووزلەند نیشتەجییە.
