مامووسا عەلی ئوڵفەتی

شاعر، ڕەخنەگر و نۊسەر ناسیاگ ئەدەبیات کوردی خوارین

 لە ساڵ 2678 (1978) لە سەرپێڵ زەهاو کرماشان وە دی هاتێیە. ئوڵفەتی لە پێشگامەیل شێعر کوردی خوارینە و جوور شاعرێگ دو زوانە (کوردی و فارسی) لە دەیەی هەفتای هەتاویەو کەم کەم ناسیا و لە حەوزەی شێعر هاوچەرخ کوردی و فارسی جی فرە دیاریێگ پێیا کرد.

دوکتۆر ئوڵفەتی لە ڕشتەی زوان و ئەدەبیات فارسی کارناسی باڵا دێرێگ و دۊاتر دوکتۆراگەی لە فەلسەفەی هونەر گردێیە. شێعر ئوڵفەتی تێکەڵێگە لە زوان داڵگی، خەم کوومەڵگا و ئەزموون ژیان خوەی لە کرماشان. چاڵاکییەیلێ لە شێعر وەتن و هەمیش لە داوەری فستیڤاڵەیل جوورایجوور، جێگە و پێگەی فرە دیاریێگ لە ئەدەبیات هاوچەرخ داگەسە پێ.

مامووسا ئوڵفەتی بەرهەمەیل کوردی و فارسی فرەیگ بڵاو کردێیە ک لە بەرهەمەیل کوردیێ تۊەنیم وە یانە ئاماژە بکەیمن: «گیان»، «سانە ناو»، «گەرمەشین»، «سزیان وەفر»، «گەرمێیان»، «سرۊت باشوور»، «لە چیمنە ڕێیەو چیمنە ڕێیەو»، «ستران»، «ئافراندن» و «کلیل کۊەسان گوم کردمە».

مامووسا ئوڵفەتی براوەی «خڵات شێعر سازمان نەتەوەیی جوانەیل ئێران»ـە، هە لەیوا خڵات و تەندیس یەکم «فستیواڵ ئەدەبی مەولەوی کورد»، «خڵات شێعر نیما»، «خڵات کتاو ساڵ کرماشان»، «خڵات ئەدەبی ئەحمەد عەزیزی»، «خڵات ئەدەبی باشوور» و «خڵات ئەدەبی قەڵەم هەژار» پێشکەش وە دوکتۆر ئوڵفەتی کریایە.