مامووسا سەعیدعبادەتیان ناسیاگ وە «بانان»
گەورە شاعر دیار کەڵهوڕ
لە ساڵ ٢٦٦٣ (١٩٦٣) لە گیەڵان کرماشان وە دی هاتێیە. بانان یەکێگ لە کەسایەتییەیل ناسیاگ شێعر و ئەدەبیات لە باشوور ڕووژهەڵات کوردستانە و کاریگەریێ نەتەنیا لە ئەدەبیات، بەڵکوو لە زوان و هونەر و ژیان کوومەڵایەتی مردم ئەی ناوچە دیارییە.
مامووسا بانان هە لە میرمناڵەییەو دەس کردەسە شێعر ئەڵوەسین و یەکم شێعرێ لە یانزە ساڵانا وەتێیە؛ لەوساوە تا ئێرنگە، ژیان هونەریی بانان لە ڕێ خزمەت وە زوان و ئەدەبیات و هونەر کرماشان و ئیلام و ناوچەی خوار ڕووژهەڵات بەردەوام بۊە.
لەی ڕێیە بانان بەرهەمەیل فرەیگ پێشکەش خەزێنەی ئەدەبیات کوردی کردێیە. کتاوەیلێگ جوور «هە لە لام بۊد گومد کردم»، «ساڵەیل لە کیس چێ»، «ئەوریشم زامەگان»، «وا درەو کەن دەسەیل م»، «خاڵێگ و شوون سێ زام». هە لەیوا ئاڵبومەیل شێعر-مووسیقێگ جوور «پابڕان»، «داخ دەوران» و «مەیلەم وە جی» و «تەنیا داخە ک ئاخ کیشێ» لە بەرهەمەیل بانانن.
بانان یەکێگ لە شاعرەیل جەریانساز باشوور ڕووژهەڵات کوردستانە ک شێعرەیلێ بۊنەسە بەشێگ لە هۊرەوەری گشتی مردم. کەمتر کەسێگ لەی ناوچە هەس ک نەتەقیاۊگە شێعر بانانەو و وەلێیان هۊرەوەریێ نییاشتووگ.
مامووسا بانان نیشتەجی شار کرماشانە و لە دەوڵەمەنکردن ئەدەبیات کوردی بەردەوامە. مەنزوومەی پاتوورە و پەری و کوومەڵە شێعر فولکلۆر کوردی، لە پرۆژەیل مامووسا بانانن کە گشت دووسدارەیل فەرهەنگ کوردی چەوەڕێیانن.
